ربنا معانا

اول ما علمت المدونة كنت بكتب دايما تدوينات عادية او بكتب قصص قصيرة و عمري ما حسيت اني عايزة اكتب في مواضيع عامة لاني بشوف مدونات كتير ممكن تتكلم في المواضيع دي احسن بس دلوقتي انا مينفعش مش اتكلم حتي لو هقول كلام اتقال قبل كده وحتي لو كنت اللي هقوله متفرع في اكتر من موضوع

اولا: برنامج واحد من الناس

بجد البرنامج بيجيب ناس ظروفها وشكلها وحياتها يصعب علي اي حد وعايزة اسأل سؤال صغير

يعني ايه ناس تعيش بين عقارب وتعابين وفئران يعني ايه واحدة اولادها الاتنين يموتوا بسبب قرص عقارب يعني ايه طفل عنده فيرس سي وحصوات في الكليه بسبب شرب مياه ملوثه يعني ايه ناس مش عندهم كهرباء وبيشتروا مياه ولا عندهم صرف صحي

ايوه يا ساده في ناس اكبر طموحها في الحياه الستر وشقه حتي لو اوضه و حمام اي حاجة تتلم فيها هي واولادها!!!!

ثانيا: حوادث اغتصاب الاطفال

يعني ايه واحد يغتصب طفله متعرفش حاجة يعني واحد يجيله اصلا التفكير ده يعني ايه تجي تقولي اصل من اللي بشوفه لبس ضيق وكليبات وافلام وهما دول اللي يخليك تغتصب طفلة حتي مش عارفة توصف اللي حصلها علشان مش فاهمه

ايوه يا ساده في ناس عايشة انتهت من قبل ما تبدأ اصلا!!!!

ثالثا: القتل

يعني ايه واحد يقتل اولاد خاله الاطفال علشان سبعين جنيه و لو سبعين مليار تقتل اطفال ملهمش ذنب في حاجة لا كمان تيجي تقولي انت ممكن تعوضهم وتجيب غيرهم بجد دي بجاحة وقله ادب وقرف

ايوه يا ساده في ناس مستعدة تقتل حتي لو علشان خمسه جنيه مش سبعين جنيه!!!!

رابعا:

يعني ايه لما كل شوية تجبولنا اعلانات عن المدن الواسعة الخضرة و اراضي الجولف وملاعب الرياضيه والنوادي الصحيه والمولات ومدارس خاصة ومستشفيات فايف ستار يعني ايه لما يكون اصلا واحد بيشوف الاعلانات دي وعمال يفكر هيغدي عياله بكره عدس اللي بقا الكليو 9 جنيه ولا يجيب اكله فول وطعميه اللي هتعدي 15 جنيه مع العلم انه بيشتغل شغلتين ده احتمال ميكونش عنده تلفزيون اصلا

ايوه يا ساده احنا عندنا ناس في السما وناس في تحت الارض مش في الارض ومفيش وسط!!!

خامسا:

يعني ايه لما الناس تنسي معني كلمة فسح و خروجات وعشا بره و نروح السينما ويبقا كل واحد بيشتغل و طالع عينه علشان ياكل عياله ويلبسهم وياريت الاكل عدل ولا الفلوس مقضيه

ايوه يا ساده في ناس بتبات من غير عشا وغدا كمان!!!!!

سادسا:

مزانية التعليم عماله تقل واحب اقول حتي لو مش قلت ان كل زي قلته 80 % من المزانية بيروح مرتبات 20% علي العملية التعلمية طيب دول هيكفوا يعني انا ابني هيطلع من المدرسة فاهم مش حافظ عارف يتعامل مع المجتمع ولا نقضيها دروس خصوصية ولا اوديهم احسن مدارس خاصة ولا بلاش مدارس اصلا اوديهم يتعلموا حرفة ويجبولي فلوس اخر كل اسبوع! انا اتخرجت من كلية الاداب قسم التاريخ احب اقول اني الحاجة اللي مش بفهمها كنت بحفظها وخلاص واكتبها في الورقة وانسي احب اقول اني لما حاولت ادور علي شغل قالولي الناس اللي متخرجة من 88 لسه مش اشتغلوا احب اقول انهم قالولي مش بنعين غير اللي معاهم تربوي طيب فاتحين كليه الاداب ليه ما كافية تربية!

ايوه يا ساده احنا بنتخرج لا نفقه شئ معانا بس شوية عقد نفسية وشوية احلام مستحيل تتحقق وشوية اهداف محكوم عليها بالاعدام!

سابعا:

يعني ايه تيجي تقولي تأمين صحي هيبقا بفلوس هو انا لو كان معايا فلوس اصلا كنت رحت التأمين الصحي دي الناس بتدخله بيجلها المرض اكتر هي الناس دي لو كان معاها ما كانت راحت لدكتور ولا جابت علاج علي حسابها هي الناس دي هتموت كام مرة!

ايوه يا ساده لو حد فينا مرض احسنله يموت احسن!!!!!

ثامنا:

يعني ايه اطفال عندهم 7 سنين و 5 سنين يجيلهم انفلونزا خنازير يعني ايه مدرسة مش فيها غير صابونة واحدة وحمامتها تجيب مرض من كتر الارف يعني ايه تروح مستشفي من مستشفيات الحميات ميرضوش يستقبلوك علشانك اقل من 65 سنة هو المفروض الرعاية تكون للشباب ولا للناس اللي اصلا ماتت!

ايوه يا ساده احنا عايشين مايتين اصلا!!!!!

تاسعا:

يعني ايه قطر واقف في المحطة يجي قطر تاني يخبط فيه ولا قطر تاني يتقلب علشان جاموسة طبعا الحق علي الجاموسه احنا يا جماعة مش صرفنا علي المصري اللي علي حق يقول للغلط لا طيب انا بقول لا لا لا لا حرام هي الناس اللي ماتت ذنبها ايه والقطارات الجديدة المجهزة علي اعلي مستوي فين والمليارات اللي اخدتها مجموعة الخبراء فين طيب احنا نحاسب مين ده السؤال مين المسئول

وبمناسبة القطر بقا ايوه يا ساده في ناس بتموت و ملهاش ديه وفي ناس لا بتلحق قطر الشغل ولا قطر الجواز ولا ركبت واحد فيهم قطر الصحة بيقولها بودعك!!!!

محدش يقولي اني متشائمة وشايفة بكره وحش لا انا شايفة اللي الناس عايشاه وبقول في سري الحمدلله انا احسن من غيري بكتيرررررررر

بس في ناس تانية من اقل حقوقها انها تعيش عيشه كريمة تلاقي اكل ومكان كويس يعيشوا فيه

انا مش شايفة بكره وحش بس ده اللي بيحصل فعلا دي حياتنا ده مجتمعنا ودي مشاكلنا اللي لو اتكلمنا فيها مش هتخلص

احنا اه محدش معانا محدش واقف جنبا بس ربنا موجود وشايفنا وهو احسن من الكل.....يارب يارب يارب